Azaroaren 18tik abenduaren 2ra Euskaraldiaren III.edizioa burutuko da “Hitzez ekiteko garaia” lelopean.

Euskaraldia ariketa sozial erraldoia da, euskaraz aritzeko eta hizkuntza ohituretan pausoak emateko ariketaldia. Ikastolak ekimen honetan izen eman du eta arigune ezberdinak izango ditugu idazkaritza, zuzendaritza eta irakaslegoan. Ikastolatik kanpo ere familiek baduzue zuen jarduera aho bizi edo belarri prest dinamikan burutzeko aukera eta hau gustoko baduzue ikastolarekin partekatzeko aukera ere aberasgarria izan daitekeela uste dugu. Beraz, zuen ekarpena gurekin partekatu nahi baduzue, idatzi labur-labur zuen esperientzia edo bidali bideo bat hori guri adieraziz euskara@artxandape.net helbidera Ekimenaren amaieran hauek jasotzen eta gure sare sozialen bidez partekatzen saiatuko gara.

Jarraian, martxan jartzeko proposamen ezberdinak luzatzen dizkizuegu. Ziur, bat edo beste gauza dezakezuela. HITZEZ EKITEKO GARAIA:

• Zuen seme-alabak euren artean eta lagunen artean euskaraz egitera gonbidatu eta bultzatu, eta egiten dutenean positiboki baloratu. 
• Umeen aurrean euskarari prestigioa eta baliagarritasuna eman, ikastolako toki mugatuei dagokien hizkuntza baino zerbait gehiago dela ikustaraziz. 
• Euskal kulturara hurbildu. Euskarazko  emanaldien berri izango duzue ikastolako webgunean nahiz giza-sareetan. Gozatu euskaraz.
• Auzoan proposatzen diren ekintzetan parte hartu: azaroaren 18an, abenduaren 2an…
• Abenduaren 7tik 11ra Durangoko euskal liburu eta disko azokara joan. 
• Etxean duzuen irratia, telebista eta ordenagailuan, ahal denean euskarazko programazioa, joku edo programak aukeratu. Pantailaldia.
• Euskaraz ez badakizue, animatu eta euskaraz zerbait ikasi, edota dakizuen apurra erabili (kaixo, egun on…). 
• Zuei bururatzen zaizuena…

Besterik barik, Euskaraldi on.